Datuak Luak Bongih

    0
    16

    LAPORAN: DODDY SASTRA

    Para tukang tulih nan hadir di ruang rapek wakia rakyaik, takojuk godang mandonga Tuak Luak baturo-turo ka stafnyo nan dinilainyo lamban dalam menjalankan tugas. Dihadapan wakia rakyaik, Tuak Luak nan salamo ko dikenal santun, randah hati indak pambogih, hari Sanayan kapotang botua-botua bogih godang, dek kalakuan anak buahnyo.

    “ Alah duo pokan ambo tando tangani surek penetatan Struktur Organisasi Perangkat Daerah (SOPD) tu, tapi alun juo diantakan ka kantua Gubernur. Iko adolah surek pantiang, indak bisa dimain-mainkan. Pak wakia rakyat nan tahormat, ambo minta maaf atas kesalahan staf-staf ambo nan indak tanggap jo tugeh pantiang ko. Nan joleh, ambo indak amuah tahu, hari ko juo poi antakan surek tu ka Padang, karano hari ko hari terakhir surek tu di tarimo Pak Gubernur, “ kecek Tuak Luak jo rono muko nan sangaik bogih.

    Sado urang nan hadir di goduang terhormat tu haniang mandanga Tuak Luak bongih. Tamasuak para tukang tulih, tampak diam sambia manyimak kato-kato bogih nan kalua dari muluik Tuak Luak.

    “ Ko joleh bona Tuak Luak dikarajoan dek anak buahnyo. Ko konspirasi godang untuk manjatuahkan Tuak Luak jo Wakianyo. Masak iyo surek pantiang nan alah duo pokan lalu alah disetujui lewat ketok palu para wakia rakyaik, alun juo ditindak lanjuti untuak ditaruihkan ka Gubernur. Ko botua-botua sangat keterlaluan, samo mamasuakan Tuak Luak ka dalam karuang,” kecek surang tukang tulih banamo Diwar kakonconyo si Nuar nan samo-samo bakarajo sebagai tukang tulih.

    “ Itulah kanti, kanti indak tahu bahaso goduang ko adalah goduang politik. Aratinyo, goduang tompek kaluanyo produk-produk politik. Indak tatutuik kamungkinan surek pantiang tu lah dipolitikan pulo dek anak buah Tuak Luak, untuak kapentingan politik-politik tertentu untuak manjatuahkan Tuak Luak,” baleh si Nuar.

    “ Manuruik den kajadian ko sangik indak wajar. Indak sadonyo nan harus dipolitikan do, nti. Tamasuak soal surek pantiang nan manyangkuik kebijakan daerah ko. Kebijak tu orek bona kaitannyo jo kemaslahatan masyarakat, tantunyo indak buliah dipolitik-politikan sasuko hati do, nti” jawek si Diwar.

    “ Itu kan kecek kanti. Tapi, indak baitu kenyataannyo bagi urang-urang politik. Bagi urang politik kasado alahe halal. Indak pantiang urang lain kataniayo, indak pantiang urang lain jadi korban. Nan joleh, untuak kapantingan politik, babagai caro dilakukannyo untuak kepentingan politiknyo. Sakalipun politik busuak,” kecek si Nuar.

    “ Kok baitu pandapek kanti, wajar sajolah Tuak Luak tu bogih godang. Soalnyo, sebagai urang nan pernah bakacipuang di dunia politik, Tuak Luak tu tahu bona tentang permainan politik. Untuak kanti ketahui, beda bona sikap politik nan ado di dalam diri Tuak Luak tu. Sikap politiknyo santun, manikam indak bajojak,” baleh si Dewar.

    “ Butua tu, nti. Nan joleh, mari samo-samo kito coliak peristiwa apo nan tajadi, sasudah Tuak Luak dikarajoan dek anak buahnyo tu. Sebagai pandeka politik, tantu Tuak Luak punyo caro lain untuak mamainkan peran politiknyo. Nan joleh, nan bungkuak pasti akan dimakan saruang,” kecek si Diwar manutuik cilotehnyo.*

    LEAVE A REPLY

    Please enter your comment!
    Please enter your name here